काठमाडौं । समस्याग्रस्त घोषित सुधीर बस्नेत संलग्न ओरेण्टल को–अपरेटिभका २ सय ८४ जना ऋणीहरूको तीन पुस्तेसहित नामावली सार्वजनिक गरिएको छ ।
भूमि व्यवस्था, सहकारी तथा गरिबी निवारण मन्त्रालय अन्तर्गतको समस्याग्रस्त सहकारी व्यवस्थापन समितिको कार्यालयले ऋण लिएर लामो समयदेखि नतिर्ने ऋणीहरूलाई तत्काल बक्यौता चुक्ता गर्न निर्देशन दिएको हो ।
समितिले सार्वजनिक सूचना जारी गर्दै यथाशीघ्र ऋण नतिरे कानुनअनुसार असुली प्रक्रिया अघि बढाइने चेतावनी दिएको छ ।
सार्वजनिक गरिएको सूचीमा सहकारीबाट ठूलो रकम ऋण लिएका व्यक्तिहरूको विवरण समावेश गरिएको जनाइएको छ । सार्वजनिक विवरणअनुसार धेरै जसो ऋणी भक्तपुरका रहेका छन् ।
सरकारले सहकारी पीडितको रकम फिर्ता गराउने अभियानलाई तीव्र बनाइरहेका बेला यो कदमलाई ठूला ऋणीमाथिको कडा कारबाहीको संकेतका रूपमा हेरिएको छ ।
